77ನೇ ಗಣರಾಜ್ಯೋತ್ಸವ ಪರೇಡ್ನಲ್ಲಿ ‘ಆಪರೇಶನ್ ಸಿಂಧೂರ್’ ಟ್ಯಾಬ್ಲೋ ಪ್ರದರ್ಶಿಸಲಿದೆ ಭಾರತೀಯ ಸೇನೆ
ನವದೆಹಲಿ: 77ನೇ ಗಣರಾಜ್ಯೋತ್ಸವ ಪರೇಡ್ ಸಂದರ್ಭದಲ್ಲಿ ಭಾರತೀಯ ಸೇನೆ ‘ಆಪರೇಶನ್ ಸಿಂಧೂರ್’ ಕುರಿತು ವಿಶೇಷ ಟ್ಯಾಬ್ಲೋವನ್ನು ಪ್ರದರ್ಶಿಸಲಿದೆ. ಈ ಟ್ಯಾಬ್ಲೋ ಮೂಲಕ ಕಾರ್ಯಾಚರಣೆಯ ವೇಳೆ ಸಾಧಿಸಲಾದ ಜಯ ಹಾಗೂ ತ್ರಿಸೇವೆಗಳ ಸಮನ್ವಯದ ಯಶಸ್ಸನ್ನು ಪ್ರದರ್ಶಿಸಲಾಗುವುದು.
ಗುರುವಾರ ನವದೆಹಲಿಯಲ್ಲಿ ಮಾಧ್ಯಮಗಳಿಗೆ ಮಾಹಿತಿ ನೀಡಿದ ದೆಹಲಿ ಸಬ್ ಏರಿಯಾದ ಮುಖ್ಯಸ್ಥ ಮೇಜರ್ ಜನರಲ್ ನವರಾಜ್ ಧಿಲ್ಲನ್, ಈ ಬಾರಿ ಪರೇಡ್ನಲ್ಲಿ ‘ಬ್ಯಾಟಲ್ ಅರೆ ಫಾರ್ಮೇಶನ್’ ಎಂಬ ಹೊಸ ಪ್ರದರ್ಶನವೂ ಮೊದಲ ಬಾರಿಗೆ ಕಾಣಿಸಿಕೊಳ್ಳಲಿದೆ ಎಂದು ಹೇಳಿದರು. ಇದರಲ್ಲಿ ಟ್ಯಾಂಕ್ಗಳು, ಕ್ಷಿಪಣಿ ವ್ಯವಸ್ಥೆಗಳು, ಡ್ರೋನ್ಗಳು ಮತ್ತು ಅತ್ಯಾಧುನಿಕ ಕವಚಿತ ವೇದಿಕೆಗಳ ಸಮನ್ವಯಿತ ಚಲನವಲನವನ್ನು ಪ್ರದರ್ಶಿಸಲಾಗುತ್ತದೆ. ಇದು ಸೇನೆಯ ತಂತ್ರಜ್ಞಾನ ಸಾಮರ್ಥ್ಯ ಮತ್ತು ಏಕೀಕೃತ ಯುದ್ಧ ಸಾಮರ್ಥ್ಯವನ್ನು ಪ್ರತಿಬಿಂಬಿಸುವ ಉದ್ದೇಶ ಹೊಂದಿದೆ ಎಂದು ಅವರು ತಿಳಿಸಿದರು.
ಮೇಜರ್ ಜನರಲ್ ಧಿಲ್ಲನ್ ಮಾಹಿತಿ ನೀಡಿದಂತೆ, ಲೆಫ್ಟಿನಂಟ್ ಜನರಲ್ ಭವ್ನಿಷ್ ಕುಮಾರ್ ನಾಲ್ಕನೇ ಸತತ ಬಾರಿ ಗಣರಾಜ್ಯೋತ್ಸವ ಪರೇಡ್ಗೆ ನೇತೃತ್ವ ವಹಿಸಲಿದ್ದಾರೆ. ಈ ಭವ್ಯ ಸಮಾರಂಭದಲ್ಲಿ ವಿವಿಧ ಘಟಕಗಳು ಮತ್ತು ದಳಗಳಿಂದ ಸುಮಾರು 6,050 ಸೈನಿಕರು ಭಾಗವಹಿಸಲಿದ್ದಾರೆ ಎಂದು ಅವರು ಹೇಳಿದರು.
ಈ ವರ್ಷದ ಪರೇಡ್ನ ವಿಶೇಷ ಆಕರ್ಷಣೆಯಾಗಿ ಶಕ್ತಿಬಾನ್ ರೆಜಿಮೆಂಟ್ನ ಭೈರವ್ ಬಟಾಲಿಯನ್ ಮೊದಲ ಬಾರಿಗೆ ಭಾಗವಹಿಸಲಿದೆ. ಜೊತೆಗೆ ಲಡಾಖ್ ಸ್ಕೌಟ್ಸ್ ಕೂಡ ಪರೇಡ್ನಲ್ಲಿ ಪಾಲ್ಗೊಳ್ಳಲಿದ್ದು, ಪ್ರಾದೇಶಿಕ ಮತ್ತು ಕಾರ್ಯಾಚರಣಾತ್ಮಕ ವೈಶಿಷ್ಟ್ಯತೆ ನೀಡಲಿದೆ. ದೃಶ್ಯ ವೈವಿಧ್ಯತೆಯನ್ನು ಹೆಚ್ಚಿಸಲು ಗಾಳಿಪಟಗಳು, ಜಾನ್ಸ್ಕಾರ್ ಕುದುರೆಗಳು ಮತ್ತು ಬ್ಯಾಕ್ಟ್ರಿಯನ್ ಒಂಟೆಗಳು ಸಹ ಈ ಬಾರಿ ಮೊದಲ ಬಾರಿಗೆ ಗಣರಾಜ್ಯೋತ್ಸವ ಸಂಭ್ರಮದಲ್ಲಿ ಕಾಣಿಸಿಕೊಳ್ಳಲಿವೆ.
ಈ ವರ್ಷದ ಭಾರತೀಯ ಸೇನೆಯ ಪ್ರದರ್ಶನವು ಕಾರ್ಯಾಚರಣಾ ಶ್ರೇಷ್ಠತೆ, ತ್ರಿಸೇವೆಗಳ ಸಮನ್ವಯ ಮತ್ತು ಭಾರತದ ಶ್ರೀಮಂತ ಸಾಂಸ್ಕೃತಿಕ ಹಾಗೂ ಭೌಗೋಳಿಕ ವೈವಿಧ್ಯತೆಯನ್ನು ಪ್ರತಿಬಿಂಬಿಸುವ ಪ್ರಮುಖ ಆಕರ್ಷಣೆಯಾಗಲಿದೆ. ಜೊತೆಗೆ ರಾಷ್ಟ್ರದ ಶಕ್ತಿ ಮತ್ತು ಏಕತೆಯ ಸಂದೇಶವನ್ನು ಮತ್ತಷ್ಟು ಬಲಪಡಿಸಲಿದೆ.
— ಹಿಂದ್ ಸಮಾಚಾರ್ ನ್ಯೂಸ್
